Protection Sociale (projet loi-cadre 09.21) | قانون إطار 09.21 للحماية الاجتماعية

وأخييييرااا القانون لي غايدير ثورة فمجال العدالة الاجتماعية فالمغرب … القانون الإطار رقم 09.21 ديال الحماية الإجتماعية  (لحد آخر تحديث لهاد التدوينة، هادشي لي غانقول مازال غير مشروع قانون .. مازال مابدا التنفيذ ديالو)

هاد القانون لي هضر عليه الملك فجوج خطب ملكية ودار عليه حفل فالقصر الملكي نهار تم إعلان التنزيل ديالو وتوقيع الاتفاقيات الإطار لي متعلقة بيه

هاد القانون لي كنا محتاجينو منذ سنوااااات وبااانت الحاجة ليه كتر فهاد العام ديال كوفيد19

أهداف قانون إطار 09.21 المتعلق بالحماية الاجتماعية

هاد القانون جا باش ينقص من الفقر ومن الهشاشة ويدعم القدرة الشرائية ديال المواطن ومنها يحقق العدالة الاجتماعية فالمغرب ويعاون الرأسمال البشري المغربي باش يطلع ويتطور

باش يتحققو هاد الأهداف خاس نحققو 4 دالأنواع ديال الحماية : كاتبدا من الحماية من مخاطر الطفولة .. الحماية من مخاطر المرض .. الحماية من مخاطر فقدان الشغل وأخيرا الحماية من مخاطر الشيخوخة … هاكا كاتكون حميتي كاع الفئات الشعبية لي عندك فالبلاد.

نبداو بالإجراءات لي غايبدا التطبيق ديالها حسب الجدول الزمني لي تحط ليه ..

#01 تعميم التغطية الصحية

من 2021 تال نهاية 2022 غادي يخدم المغرب على توسيع وتعميم التغطية الصحية الإجبارية .. كيفاش ؟ غانشرح ليك

المغرب بغا يعمّم التأمين الإجباري الأساسي عن المرض .. أو ما يسمى ب “لامو” لي كايكون مسؤول عليها الصندوق الوطني للضمان الإجتماعي.

الوزير بنشعبون كايقول أن هاد التأمين غادي يتعمم على 22 مليون شخص إضافي وهو تأمين كايشمل تكاليف العلاج والأدوية والاستشفاء.

أول فئة غادي تستافد من هاد التأمين هي فئة التجار والحرفيين والمهنيين، ولي كايقدمو خدمات بشكل مستقل سوا لي خاضعين لنظام المساهمة المهنية الموحدة (النظام الضريبي الجديد لي بدا التطبيق ديالو هاد العام) أو لنظام المقاول الذاتي أو لنظام المحاسبة. العدد ديال هاد الفئة كايوصل ل 800 ألف منخرط.

من بعد غايستافد من هاد التأمين الحرفيين ومهنيي الصناعة التقليدية لي واصل العدد ديالهوم ل 500 ألف منخرط

ومن بعد غايستافدو الفلاحين، لي واصل العدد ديالهوم ل 1,6 مليون منخرط تقريبا

هاد الفئات ب 3 هوما لي تسنات حاليا الاتفاقيات الإطار ديالهوم بحضور الملك.. وغاتجي من بعد أسابيع اتفاقيات ديال استفادة الناس لي خدّامين فالنقل وأصحاب المهن الحرة بحال المهندسين الأطباء والمحامين.

هادو كاملين بالأسر ديالهوم كايقول الوزير بنشعبون أنهوم كايمثلو 11 مليون مواطن وخاس يكونو قبل نهاية 2021 بداو كايستافدو من التأمين الإجباري عن المرض…

كاتبقا 11 مليون من مجموع 22 مليون لي قلنا قبيلا. وهوما الفئات المعوزة لي كانت كاتستافد من نظام الرميد .. هاد الناس تاهوما غادي يوليو داخلين فالتأمين الإجباري عن المرض منذ بداية سنة 2022.

هادشي كااامل غييير الرُّبع ديال داكشي لي جا بيه هاد القانون الإطار

#02 توسيع الاستفادة من التعويضات العائلية

ندوزو للربع الثاني .. ولي كايهم الحماية من مخاطر الطفولة .. ولي فيه غايتم توسيع الاستفادة من التعويضات العائلية 

هاد الشطر ما غايبدا التطبيق ديالو تال 2023 و 2024 .. ولكن مافيها باس نشرحوه دابا

العائلات لي عندها دراري صغار قل من 21 عام غادي يبداو يستافدو من تعويضات عائلية باش مايخليوش ولادهوم يخرجو من المدرسة .. 

أما بالنسبة للعائلات لي ماعندهاش كاع أطفال ولا ولادهوم فااتو العمر ديال 21 سنة ف هادو غادي يستافدو من تعويضات جزافية لي غادي تعاونهوم فالقدرة الشرائية وباش يخرجو من حالة الهشاشة .. 

فهاد النقطة بغيت ندوي ليكوم على واحد البلان خدام عليه المغرب .. وهوا اعتماد “السجل الاجتماعي الموحد” باش يسهال عليه من هنا لقدام يعرف الوضعية ديال كل أسرة مغربية .. شحال هوما ف الدار .. العمر ديالهوم كايقراو ولا خدامين وفاش خدامين وأي معلومة غادي تعاون السلطات باش يعرفو الحالة الاجتماعية وشكون يستاحق هاد التعويضات.

كولشي عارف كيفاش كان المغرب محتااااج لهاد السجل الاجتماعي الموحد خصوصا فديك الفترة ديال بداية الحجر الصحي وكيفااش نقدرو نحصيو الفئات لي محتاجة الدعم بلاا مايبدا كل رب أسرة كايصيفط “رسالة نصية” ولا كايتسجل فشي موقع إلكتروني…. وموهيم ديك بلا بلا بلا كاملة لي عشنا كاملين وضاعو فيها فلوس و وقت ومجهود ….

وديما ف نفس الإطار كايقول هاد القانون بلي الميزانية لي غادي تخصص لهاد التعويضات بغا المغرب يجيبها من إصلاح نظام المقاصة .. . آآه داك النظام لي من ديما كانسمعو بيه ولي ديما خاصو إصلاح ومازال ماتصلح … 

دوزنا دابا النص ف القانون .. النصف الأخير فيه جوج ديال الإصلاحات ولي غادي تطبق ف سنة 2025 ..

#03 توسيع قاعدة المنخرطين فأنظمة التقاعد

أولهوم توسيع المنخرطين فأنظمة التقاعد .. باش يولِّي أي شخص عندو أي خدمة وماكايستافد حاليا من حتا معاش .. غادي يولّي يستافد من نظام تقاعد … هاد النظام غادي يستافدو منو كوولشي دوك الفئات لي دوينا عليهوم ف البداية فيما يخص التغطية الصحية .. ولي هي فئة التجار والحرفيين والمهنيين، ولي كايقدمو خدمات بشكل مستقل ومهنيي الصناعة التقليدية والفلاحين والناس لي خدّامين فقطاع النقل وأصحاب المهن الحرة بحال المهندسين الأطباء والمحامين.

#04 تعميم الاستفادة من التعويض عن فقدان الشغل

تعميم الاستفادة من التعويض عن فقدان الشغل غايهم أي شخص كان عندو عمل قار .. ومن خلالو غادي يتم تبسيط شروط الاستفادة من هاد التعويض وتوسيع الفئات لي ممكن تستافد منو … 

طبعا هاد النقط 3 الأخيرة ماعليهاش تفاصيل أكثر حيت مازال ماغايبدا التنزيل ديالها ف أرض الواقع .. وبالتالي فاش غايقرب وقتها راه غاتبان معلومات أكثر ويتفصل فيها مزيان على كيفاش غاتطبق وعلامن وشناهيا هاد الشروط الجديدة وزيد وزيد …

Laisser un commentaire

Votre adresse e-mail ne sera pas publiée. Les champs obligatoires sont indiqués avec *

Aller en haut